Acts 25

Paul e hiihai e gabunga labelaa i baahi o Caesar

1Nia laangi e dolu no muli, Festus ne dau i di guongo deelaa, gei mee ga hagatanga i Caesarea, ga hana gi Jerusalem. 2Di madagoaa nia dagi hai mee dabu mo nia dagi o digau o Jew ne hai baahi gi Paul, digaula ga tangi gi Festus 3bolo gi heia nadau manawa gi hagau ina a Paul gi Jerusalem, idimaa, digaula gu hagatogomaalia di nadau buini belee daaligi a mee gi made i hongo di ala. 4Festus ga helekai, “Paul la i-lodo di hale galabudi i Caesarea, hoohoo mai hua gei au ga hana gi golo. 5Gei godou dagi gi hula madalia au gi Caesarea, e hagi aga taane deelaa, be mee gu hai ana mee hala.” 6Festus gu noho nia laangi e walu be e madangaholu i baahi digaula, ga nomuli ga hana gi Caesarea. Dono daiaa, gei mee ga noho i di gowaa hai gabunga, ga helekai bolo gi laha mai a Paul. 7Di madagoaa Paul ne dau, digau o Jew ala ne loomoi i Jerusalem, ga tuu i-nua ga haganiga a mee, ga hai nadau hagi aga i nia huaidu llauehaa hai baahi gi mee, gei digaula nadau haga modongoohia donu ai. 8Paul ga bida abaaba ia: “Au digi hai dagu ihala hai baahi gi nia haganoho digau o Jew, be e hai baahi gi di Hale Daumaha, be e hai baahi gi Caesar.” 9Festus e hiihai bolo ia e hai gi humalia i baahi digau o Jew, dela ne hidi iei mee ga heeu gi Paul, “Goe e hiihai e hana gi Jerusalem, e hagi aga i ogu mua i golo i nia mee ala e hagahuaidu goe?” 10Paul ga helekai, “Au belee duu i mua di goaa gabunga o Caesar, deelaa di gowaa e tau di- hagi aga au. Au digi hai dagu mee hala ang gi digau o Jew, be dau iloo. 11Maa au gu oho taganoho, gu hai dagu mee ga hidi mai iei au ga kae di hagaduadua o di made, au hagalee hai bolo au ga mehede gi daha. Maa nadau hagahuaidu ala belee hagahuaidu au le e dilikai, malaa, deai tangada e mee di wanga au gi digaula ai. Au e hiihai e gabunga labelaa i baahi o Caesar.” 12I muli hua Festus ne helehelekai gi ana gau hagamaamaa, gei mee ga helekai, “Goe e hiihai bolo e gabunga labelaa i baahi o Caesar, gei goe ga hana gi mee!”

Paul i mua o Agrippa mo Bernice

13Mai gi nomuli, king Agrippa mo dono duaahina ahina go Bernice ga lloomoi gi Caesarea belee haga heetugi gi Festus. 14I muli hua nia laangi dulii i di nau noho i golo, gei Festus ga haga modongoohia a Paul gi di king boloo: “Taane galabudi i ginei ne dugu go Felix. 15Gei dogu hana gi Jerusalem, nia dagi hai mee dabu mo nia dagi mmaadua o Jew ga hagahuaidu a mee mai gi di au, ga dangi mai bolo mee daaligi gi made. 16Gei au ne helekai gi digaula bolo gimaadou digau o Rome e hagalee e hagahuaidu tangada i mua dono heetugi gi tangada ne hagahuaidu ia, gei gu duuli ia gi daha mo nia hagahuaidu ala e hai baahi ang gi deia. 17I di nadau lloomoi gi kinei, gei au ga hagalimalima ga noho gi dogu lohongo gabunga, ga hai dagu hegau gi taane deelaa gi hanimoi. 18Gei digau ala ne hagahuaidu a mee gu tuu i-nua, gei digaula digi hagahuaidu ina a mee gi di hagadilinga hala huaidu dela ne hagamaanadu ko au bolo ga hai go digaula. 19Gei di mee digaula ne hai, ne lagamaaloo gi mee i di gili di nadau daumaha donu mo taane dono ingoo go Jesus dela ne made, gei Paul e hai bolo mee e mouli. 20Au gu deemee di haga noho be dehee dagu hai e mee di kae dagu haga modongoohia o nia mee beenei, gei au ga heeu gi Paul be mee e hiihai e hana gi Jerusalem e hagi aga i di hai o di hagahuaidu deenei. 21Gei Paul e hai bolo ia e gabunga labelaa. Mee e hiihai bolo ia e galabudi huaigolo, gi dugu ang gi Caesar e hagabaubau dana gabunga. Gei au gu hagababa bolo mee e galabudi hua, ga dae loo gi di madagoaa dela e mee di hagau a mee gi Caesar.” 22Agrippa ga helekai gi Festus, “Au e hiihai bolo ma ko au donu hua belee hagalongo gi taane deenei.”

Festus ga helekai, “Daiaa gei goe ga hagalongo gi mee.” 23Dono daiaa, gei Agrippa mo Bernice ga lloomoi gu madamada huoloo, ga ulu gi lodo di gowaa hai gabunga, mo nia dagi dauwa aamua, mo nia dagi o di guongo deelaa. Festus ga hai dana hegau gi laha mai a Paul, gei mee ga laha mai. 24Festus ga helekai, “King Agrippa mo goodou huogodoo ala i madau baahi i ginei. Goodou gu iloo taane deenei e hai baahi ginai digau o Jew huogodoo, digau ala i ginei mo i Jerusalem. Digaula ne hagahuaidu a mee mai gi di au mo di wwolowwolo bolo mee e daaligi gi made. 25Gei au digi gidee bolo mee gu hai dana mee ga hidi ai iei mee belee daaligi gi made, gei di maa go mee hua dela ne hai bolo dana gabunga le e wanga gi Caesar, gei au gu hagamaanadu bolo e hagau a mee gi Caesar. 26Dagu mee ne togomaalia i di gili o maa ai bolo ga hihi ai dagu beebaa gi di tagi go Caesar. Deelaa laa, au gu laha mai a mee gi godou mua, gei donu gi oo mua, meenei king Agrippa! Gei i muli dagu iloo nia hangaahai o maa, gei au dagu mee i golo e hihi i mee. 27Idimaa, ma dono hadinga ai, maa au ga hagau dagu dangada galabudi, gei digi haga modongoohia gi madammaa nia hagahuaidu ala e hai baahi gi mee!”
Copyright information for KPG